پاکستان کی معروف ٹک ٹاکر سامعہ حجاب نے اپنی نئی ویڈیو میں حسن زاہد سے اپنے تعلقات سے متعلق تہلکہ خیز انکشاف کیا ہے۔
ٹک ٹاکر سامعہ حجاب کے قتل اور اغوا کی دھمکیوں کے کیس میں نیا موڑ آگیا ہے، انہوں نے سوشل میڈیا پر گردش کرنے والی قیاس آرائیوں کا جواب دیتے ہوئے چونکا دینے والے انکشافات کیے ہیں۔
جس نے حال ہی میں ایک نوجوان کے خلاف اغوا اور قتل کی دھمکیاں دینے کا مقدمہ درج کرایا، اب سوشل میڈیا پر شیئر کیے گئے ایک ویڈیو بیان میں انہوں نے اعتراف کیا کہ گرفتار ملزم حسن زاہد کی ان سے منگنی ہوئی تھی لیکن حسن کی حقیقت معلوم ہونے کے بعد انہوں نے رشتہ ختم کر دیا۔
ان کا یہ بیان آن لائن منظر عام پر آنے والی ویڈیوز کے بعد سامنے آیا ہے جس میں انہیں تحائف وصول کرتے ہوئے اور حسن زاہد سے ملاقات کرتے ہوئے دکھایا گیا ہے، جس سے صارفین کی جانب سے تنقید کی گئی جنہوں نے ان پر توجہ حاصل کرنے کا الزام لگایا تھا۔
سامعہ حجاب نے اپنا موقف واضح کرتے ہوئے کہا کہ اگر مجھے میری دوست ثنا یوسف کی طرح قتل کر دیا جاتا تو لوگ ہمدردی کا اظہار کرتے لیکن جب سے میں زندہ ہوں تو مجھ پر الزامات لگائے جارہے ہیں۔
انہوں نے کہا کہ اگر عورت شادی شدہ بھی ہے تو مرد کو یہ حق نہیں پہنچتا کہ وہ اُسے مجبور کرے، اس کے ساتھ زیادتی کرے یا اسے اغوا کرے، حسن زاہد سے میرا رشتہ بہت پہلے ہی ختم ہوگیا تھا۔
سامعہ حجاب نے مزید الزام لگایا کہ بریک اپ کے باوجود زاہد نے زبردستی میرا فون چھین لیا، مجھے گھسیٹا، مجھ پر حملہ کیا اور اغوا کرنے کی بھی کوشش کی، حسن نے انہیں تیزاب پھینکنے اور جان سے مارنے کی دھمکیاں بھی دیں۔
ان کا کہنا تھا کہ اگر لوگ ساتھ نہیں دے سکتے تو کم از کم ان کی زندگی مشکل نہ بنائیں، میں شدید ذہنی تناؤ سے گزر رہی ہوں اور لوگوں پر زور دیا کہ وہ حقائق جانے بغیر رائے قائم نہ کریں۔
انہوں نے لڑکیوں کو پیغام دیا کہ ڈرنا چھوڑ دیں اور اپنے حق کے لیے آواز اٹھائیں، ورنہ وہ بھی ان لڑکیوں میں شامل ہو جائیں گی جنہیں بعد میں انصاف نہیں ملا۔
