عدالت نے بچی سے غیر اخلاقی حرکت کرنے والے ڈرائیور کو 14 سال قید اور 10 لاکھ جرمانے کی سزاسنا دی۔

تفصیلات کے مطابق کراچی میں ایڈیشنل ڈسٹرکٹ اینڈ سیشن جج وسطی نے بچی سے غیر اخلاقی حرکات کے الزام میں گرفتار ڈرائیور اویس خان کو مجرم قرار دیتے ہوئے 14 سال قید اور 10 لاکھ روپے جرمانے کی سزا سنا دی۔
عدالت نے حکم دیا کہ جرمانہ ادا نہ کرنے کی صورت میں مجرم کو مزید 3 سال قید بھگتنا ہوگی۔
پراسیکیوٹر نے بتایا کہ ملزم اویس خان بچی کو اسکول سے گھر لے جانے کے لیے پک اینڈ ڈراپ سروس فراہم کرتا تھا، بچی نے والدین کو بتایا کہ ڈرائیور راستے میں اس کے ساتھ غیر اخلاقی حرکات کرتا ہے تو والدین نے فوری طور پر اسکول میں شکایت درج کرائی جس کے بعد ڈرائیور کو گرفتار کر لیا گیا۔
ملزم کے خلاف مقدمہ تھانہ تیموریہ میں درج کیا گیا تھا تاہم عدالت نے قرار دیا کہ استغاثہ ملزم پر جرم ثابت کرنے میں کامیاب رہا ہے۔