غزہ میں جنگ بندی کے باوجود اسرائیل باز نہ آیا

غزہ میں جنگ بندی کے باوجود اسرائیل باز نہ آیا، اسرائیلی فوج کی بمباری سے دیر البلاح میں مزید دو فلسطینی شہید ہو گئے جبکہ اسرائیل نے جنوبی لبنان میں بھی حزب اللہ کے ایک کارکن کو نشانہ بنانے کا دعویٰ کیا ہے۔
غیر ملکی ذرائع ابلاغ کے مطابق غزہ میں جنگ بندی کے باوجود اسرائیل کا ظلم جاری ہے، صرف چند امدادی ٹرکوں کو ہی غزہ میں داخلے کی اجازت مل سکی ہے۔ جس سے بنیادی ضروریات پوری ہونا ممکن نہیں۔
اسرائیل کی رکاوٹوں کے باعث فلسطینیوں کو خوراک، پانی اور پناہ کے لیے شدید مشکلات کا سامنا ہے۔
اس سے قبل جنوبی لبنان کے قصبے تول میں اسرائیل نے ڈرون حملہ کیا جس کے باعث 2 افراد شہید اور 2 زخمی ہو گئے۔
عرب میڈیا کا اس حوالے سے کہنا ہے کہ بمباری میں اسرائیل نے کار کو ڈرون سے نشانہ بنایا، جس کے نتیجے میں شہادتیں ہوئیں۔
مشرقی اور جنوبی لبنان میں گزشتہ روز بھی اسرائیلی فضائی حملوں میں 4 افراد جام شہادت نوش کرگئے تھے۔
اسرائیل نے دعویٰ کیا تھا کہ گزشتہ روز کیے گئے حملوں میں مزاحمتی تنظیم حزب اللّٰہ کے ٹھکانوں کو ٹارگٹ کیا تھا۔
عرب میڈیا کے مطابق اسرائیل نے حزب اللّٰہ کے ساتھ نومبر 2024ء کے معاہدے کی تقریباً روزانہ کی بنیاد پر خلاف ورزی جاری رکھی ہوئی ہے۔