امیر جماعت اسلامی حافظ نعیم الرحمان نے اعلان کیا ہے کہ 7 اگست کو ملک گیر احتجاج کے دوران ملک بھر کی اہم شاہراہیں بند کی جائیں گی، تاہم ایمرجنسی سروسز بالخصوص ایمبولینسز کو بلا رکاوٹ گزرنے دیا جائے گا۔
اپنے بیان میں حافظ نعیم الرحمان نے کہا کہ جماعت اسلامی عوام کو ریلیف دلوانے کے لیے حکومت پر دباؤ بڑھائے گی اور احتجاجی تحریک کو ہر صورت کامیاب بنایا جائے گا۔ انہوں نے بتایا کہ احتجاج کی تیاری کے سلسلے میں ملک بھر میں 20 ہزار کارنر میٹنگز منعقد کی جائیں گی۔
انہوں نے حکومت سے مطالبہ کیا کہ فوری طور پر پیٹرولیم لیوی ختم کی جائے اور آئی پی پیز کے معاہدوں پر نظرثانی کی جائے تاکہ عوام پر معاشی بوجھ کم ہو۔
حافظ نعیم الرحمان نے مزید کہا کہ جماعت اسلامی کی پرامن اور جمہوری جدوجہد میں کوئی رکاوٹ نہ ڈالی جائے، جبکہ تاجروں، وکلا، طلبہ، مزدوروں اور دیگر شعبہ ہائے زندگی سے تعلق رکھنے والے افراد سے احتجاج میں بھرپور شرکت کی اپیل بھی کی۔
