کراچی: کسٹمز حکام نے کراچی سے دبئی روانہ ہونے والے ایک ہی خاندان کے 6 افراد کے قبضے سے بڑی مقدار میں غیرملکی کرنسی اور پاکستانی روپے برآمد کر لیے۔
کسٹمز کے مطابق مسافروں سے 55 ہزار امریکی ڈالر اور 9 لاکھ 50 ہزار روپے برآمد ہوئے۔ حکام کا کہنا ہے کہ مسافروں نے غیرملکی کرنسی کا لازمی ڈیکلیئریشن نہیں کیا تھا، جس پر کسٹمز ایکٹ 1969 کے تحت قانونی کارروائی عمل میں لائی گئی۔
کسٹمز حکام نے بتایا کہ برآمد ہونے والی غیرملکی کرنسی اسٹیٹ بینک کی مقررہ حد سے زائد تھی۔ ان کا کہنا تھا کہ کرنسی اسمگلنگ کی روک تھام کے لیے زیرو ٹالرنس پالیسی پر سختی سے عمل کیا جا رہا ہے اور قانون کی خلاف ورزی پر بلاامتیاز کارروائی جاری رہے گی۔
