اسلام آباد: پاکستان پیپلز پارٹی کے سینئر رہنما اور سابق وزیراعظم راجہ پرویز اشرف نے آزاد کشمیر کے انتخابات میں بعض پولنگ اسٹیشنز پر مبینہ بے ضابطگیوں پر شدید تحفظات کا اظہار کرتے ہوئے فوج کی نگرانی میں دوبارہ پولنگ کرانے کا مطالبہ کیا ہے۔
اپنے بیان میں راجہ پرویز اشرف نے الزام عائد کیا کہ متعدد پولنگ اسٹیشنز پر پیپلز پارٹی کے پولنگ ایجنٹس کو زبردستی باہر نکالا گیا، جبکہ مسلح افراد کی موجودگی، انتخابی عمل میں مداخلت اور جعلی ووٹنگ کی شکایات بھی سامنے آئی ہیں، جن کی شفاف تحقیقات ضروری ہیں۔
انہوں نے مطالبہ کیا کہ الیکشن کمیشن آزاد کشمیر حلقہ ایل اے-12 کے متنازع پولنگ اسٹیشنز کے نتائج فوری طور پر روک کر ان کی تحقیقات کرے، اور تحقیقات مکمل ہونے کے بعد متاثرہ پولنگ اسٹیشنز پر فوج کی نگرانی میں دوبارہ پولنگ کرائی جائے۔
راجہ پرویز اشرف کا کہنا تھا کہ آزادانہ، منصفانہ اور شفاف انتخابات ہر امیدوار اور ووٹر کا بنیادی جمہوری حق ہیں، لہٰذا عوامی مینڈیٹ پر اثرانداز ہونے کی کسی بھی کوشش کو قبول نہیں کیا جا سکتا۔
انہوں نے چیف الیکشن کمشنر آزاد کشمیر سے مطالبہ کیا کہ تمام امیدواروں کو مساوی انتخابی ماحول فراہم کیا جائے اور دوبارہ پولنگ کے عمل کی تکمیل تک حلقے کے حتمی نتائج جاری نہ کیے جائیں۔
