آزاد کشمیر قانون ساز اسمبلی کے انتخابات کے پہلے مرحلے میں میرپور ڈویژن کے 13 حلقوں میں پولنگ جاری ہے۔ آج میرپور، کوٹلی اور بھمبر کے اضلاع میں پیپلز پارٹی، مسلم لیگ ن، استحکامِ پاکستان پارٹی اور آزاد امیدواروں سمیت 296 امیدوار میدان میں ہیں۔
انتخابات کے لیے میرپور ڈویژن میں 2 ہزار 454 پولنگ اسٹیشن قائم کیے گئے ہیں، جہاں 14 لاکھ سے زائد رجسٹرڈ ووٹرز اپنا حقِ رائے دہی استعمال کر رہے ہیں۔
دوسری جانب بھمبر میں دربار بابا شادی شہید کے پولنگ اسٹیشن پر ہنگامہ آرائی کے دوران شرپسندوں نے بیلٹ باکس چھین کر آگ لگا دی، جس میں 232 ووٹ موجود تھے۔ حکام کے مطابق متاثرہ پولنگ اسٹیشن پر دوبارہ پولنگ کا فیصلہ بعد میں کیا جائے گا۔
آئی جی پولیس آزاد کشمیر نے کہا ہے کہ قانون ہاتھ میں لینے والوں کے خلاف کارروائی کی جائے گی، جبکہ چیف سیکرٹری آزاد کشمیر نے کہا کہ پُرامن انتخابات کے لیے تمام انتظامات مکمل ہیں اور امن خراب کرنے والوں سے سختی سے نمٹا جائے گا۔
