کینیڈا امریکا کے ساتھ تجارتی مذاکرات دوبارہ شروع کرنے کو تیار

کینیدین وزیراعظم مارک کارنی نے کہا ہے کہ کینیڈا امریکا کے ساتھ تجارتی مذاکرات دوبارہ شروع کرنے کو تیار ہے۔
رائٹرز کے مطابق کینیڈین وزیر اعظم نے جمعہ کو کہا کہ کینیڈا امریکا کے ساتھ تجارتی مذاکرات دوبارہ شروع کرنے کو تیار ہے جو صدر ڈونلڈ ٹرمپ نے اونٹاریو کی صوبائی حکومت کی جانب سے جاری کردہ ٹیرف مخالف اشتہار پر روک دیے تھے۔
رپورٹ کے مطابق مارک کارنی نے وزیراعظم بننے کے بعد وائٹ ہاؤس کے دو دوروں میں ٹرمپ کی جانب سے اسٹیل، ایلومینیم اور آٹوز پر عائد درآمداتی ٹیرف کم کرنے کا معاہدہ کرنے کی کوشش کی تھی جو کینیڈا کی معیشت کو نقصان پہنچا رہے ہیں لیکن گزشتہ روز امریکی صدر نے کینیڈا سے تجارتی مزاکرات ختم کرنے کا اعلان کیا تھا۔
تاہم اب کینیڈین وزیراعظم نے آسیان سمٹ کیلئے کوالالمپور روانگی سے قبل کہا کینیڈا نے امریکا کے ساتھ تجارتی مذاکرات میں بہت زیادہ پیشرفت کی تھی، اب جب امریکا تیار ہو گا، ہم اس سے مذاکرات دوبارہ شروع کرنے پر تیار ہیں۔
کینیڈین وزیرِ اعظم کا کہنا ہے کہ تسلیم کرتے ہیں کہ امریکا کی پالیسی بدل گئی ہے، کینیڈین حکام تجارتی مذاکرات پر کام کر رہے ہیں لیکن ہم ایشیائی ممالک سمیت نئی شراکت داریوں پر بھی توجہ دے رہے ہیں۔
یاد رہے کہ گزشتہ روز صدر ٹرمپ نے کینیڈا کے ساتھ تجارتی مذاکرات ختم کرنے کا اعلان کیا تھا، صدر ٹرمپ کے مطابق کینیڈا نے جعلی ٹی وی اشتہار جاری کیا جس میں امریکی محصولات سے متعلق حقائق کو توڑ مروڑ کر پیش کیا گیا۔