ڈونلڈ ٹرمپ اور شی جن پنگ کی ملاقات طے پا گئی

امریکی صدر ڈونلڈ ٹرمپ اور ان کے چینی ہم منصب شی جن پنگ کے درمیان ملاقات طے پا گئی جسے دنیا بھر میں تجارتی تناؤ میں کمی کے حوالے سے اہم قرار دیا جا رہا ہے۔
خبر رساں ایجنسی روئٹرز کی رپورٹ کے مطابق چین نے تصدیق کی ہے کہ صدر شی جن پنگ جمعرات (30 اکتوبر 2025) کو جنوبی کوریا میں امریکی ہم منصب ڈونلڈ ٹرمپ سے ملاقات کریں گے۔
ترجمان چینی وزارت خارجہ نے بتایا کہ دونوں سربراہان مملکت اسٹریٹجک اور طویل مدتی مسائل پر گہرائی سے تبادلہ خیال کریں گے۔
انہوں نے کہا کہ ہم امریکا کے ساتھ مل کر اس ملاقات کے مثبت نتائج کو فروغ دینے اور چین امریکا تعلقات کی مستحکم ترقی کیلیے نئی رہنمائی اور محرک فراہم کرنے کیلیے مشترکہ کوششیں کرنے کے خواہشمند ہیں۔
ڈونلڈ ٹرمپ آج جنوبی کوریا پہنچے ہیں تاہم دورانِ سفر ایئر فورس ون میں صحافیوں سے گفتگو میں ان کا کہنا تھا کہ وہ اور صدر شی جن پنگ دونوں ممالک کیلیے اچھا معاہدہ کرنے جا رہے ہیں۔
دونوں ممالک کے صدور کی ملاقات کی توقعات نے گزشتہ مہینے مارکیٹوں کو مستحکم کرنے میں مدد دی جبکہ نئے تجارتی تناؤ نے خدشات پیدا کیے تھے کہ دونوں رہنما عالمی سپلائی چینز کو درہم برہم کرنے والی ٹیرف جنگ کو حل کرنے کیلیے مذاکرات سے دستبردار ہو سکتے ہیں۔
واشنگٹن نے تجارتی جنگ کی شدت میں اضافے کا الزام چین کی نئی نایاب زمینی برآمدات کے کنٹرولز پر لگایا جبکہ چین کا مؤقف ہے کہ یہ واشنگٹن کی جانب سے چینی کمپنیوں کی امریکا میں سرمایہ کاری کی صلاحیت کو مزید محدود کرنے سے شروع ہوا۔
شی جن پنگ جمعرات سے ہفتے تک جنوبی کوریا میں ایشیا پیسیفک اکنامک کوآپریشن کی میٹنگ اور ملک کے سرکاری دورے پر ہوں گے تاہم ٹرمپ سربراہی اجلاس میں شرکت نہیں کریں گے