دہشت گردی ایک دن کی پیداوار نہیں:جنرل سلمان اکرم راجہ

پشاور : پاکستان تحریک انصاف (پی ٹی آئی) کے سیکرٹری جنرل سلمان اکرم راجہ کا کہنا ہے کہ دہشت گردی ایک دن کی پیداوار نہیں، دہشت گردی کاالزام کسی ایک جماعت پر نہیں لگا سکتے۔
تفصیلات کے مطابق پاکستان تحریک انصاف (پی ٹی آئی) کے سیکرٹری جنرل سلمان اکرم راجہ پریس کانفرنس کرتے ہوئے کہا ہے کہ خیبرپختونخوا میں پارٹی فیصلے کے مطابق تبدیلی عمل میں لائی گئی ہے۔
ان کا کہنا تھا کہ ہم اپنے شہدا کے ساتھ کھڑے ہیں، اور یہ ہم پر بہتان ہے کہ ہم کسی کے خون کو کمتر سمجھتے ہیں۔ بانی پی ٹی آئی گزشتہ 30 سال سے مذاکرات کی بات کرتے آرہے ہیں، لیکن یہ دہشتگردی کسی ایک دن کی پیداوار نہیں۔
سلمان اکرم راجہ نے کہا کہ دہشت گردی کا الزام کسی ایک جماعت پر نہیں لگایا جا سکتا، یہ ایک قومی مسئلہ ہے جس کے لیے تمام اداروں اور جماعتوں کو مل کر فیصلے کرنے ہوں گے تاہم کوئی بھی پالیسی بنانے سے پہلے عوام کو اعتماد میں لینا ضروری ہے۔
انہوں نے مزید کہا کہ پی ٹی آئی کے دورِ حکومت میں دہشتگردی کی شرح سب سے کم رہی، مگر اب ملک کو دوبارہ امن و استحکام کے راستے پر لانے کے لیے سنجیدہ فیصلوں کی ضرورت ہے۔
سلمان اکرم راجہ نے کہا کہ نئے قائد ایوان کے انتخاب میں کوئی رکاوٹ نہیں، گورنر یہ نہیں کرسکتا کہ میں استعفیٰ قبول نہیں کرتا۔
ان کا کہنا تھا کہ گورننس کا مسئلہ صرف کے پی نہیں بلکہ پورے ملک میں موجود ہے، تاہم خیبرپختونخوا میں گورننس کو مزید بہتر بنایا جا سکتا ہے۔
پی ٹی آئی رہنما نے کہا کہ آج بتایا جارہاہے کہ صوبےمیں گورنرراج نافذ کیا جائے گا، پاکستان کا ہر ادارہ ہمارا ادارہ ہے، اور یہ ریاست ہماری ہے۔