کراچی: محکمہ موسمیات کا کہنا ہے کہ آئندہ چند روز تک کراچی کا موسم گرم و مرطوب رہے گا جبکہ کراچی میں مون سون کا سلسلہ 30 ستمبر تک رہے گا۔
محکمہ موسمیات کے مطابق سمندری ہوائیں بحال ہوچکی ہیں، جبکہ جنوب مغربی سمت سے 15 کلومیٹر فی گھنٹہ کی رفتارسے ہوائیں چل رہی ہیں۔
شہر کا آج زیادہ سے زیادہ درجہ حرارت 34 ڈگری سینٹی گریڈ تک جاسکتا ہے، کراچی کی فضا میں نمی کا تناسب اس وقت 85 فیصد ہے۔
محکمہ موسمیات کے مطابق ہوا میں نمی زائدہونے سے اچانک بادلوں کی تشکیل ہوسکتی ہے، لوکل ڈیولپمنٹ کے سبب کراچی میں بوندا باندی یا ہلکی بارش متوقع ہے۔
بیان میں کہا گیا ہے کہ مون سون کا اگلا اسپیل آئندہ 5 روز میں شہر میں بادل برسا سکتا ہے۔
دوسری جانب سنگاپور کی حکومت نے پاکستان کے سیلاب متاثرین کیلئے 50 ہزار ڈالر امداد کا اعلان کیا ہے۔
پاکستان میں طوفانی بارشوں اور بھارت کی جانب سے چھوڑے جانے والے آبی ریلوں سے پاکستان کے کئی شہروں میں سیلاب نے تباہی مچا رکھی ہے۔
سیلاب سے لاکھوں افراد متاثر ہوئے ہیں اور سیکڑوں قیمتی جانوں کا نقصان بھی ہوا ہے۔
اس مشکل صورتحال میں اقوام متحدہ سمیت عالمی اداروں، امریکا و برطانیہ اور دیگر برادر ممالک نے پاکستان میں سیلاب متاثرین کیلیے امداد کا اعلان کیا ہے۔
سنگاپور حکومت کی جانب سے پاکستان کے عوام کیساتھ یکجہتی کا اظہار کرتے ہوئے 50 ہزار ڈالر امداد کا اعلان کیا ہے۔ سنگاپور کی امداد سیلاب متاثرین کی بحالی،ریسکیوکاموں میں معاونت کیلئے فراہم کی جائے گی۔
اس کے علاوہ ایشیائی ترقیاتی بینک کے صدر نے سیلاب متاثرین کیلئے 3 ملین ڈالر کی ہنگامی امداد کا اعلان کر دیا۔جبکہ پاکستان میں تباہ کن سیلاب کے متاثرین کیلئے امریکا کی جانب سے ضروری امدادی سامان فراہم کیا گیا ہے۔
