پشاور: صوبائی ڈیزاسٹر مینجمنٹ اتھارٹی (پی ڈی ایم اے) نے خیبر پختونخوا کے بالائی اضلاع میں گلیشیائی جھیلوں کے پھٹنے کے خدشے کے پیش نظر الرٹ جاری کر دیا ہے۔
پی ڈی ایم اے کے مطابق درجہ حرارت میں اضافے اور شدید گرم موسم کے باعث گلیشیئرز تیزی سے پگھل رہے ہیں، جس سے گلیشیائی جھیلوں کے پھٹنے اور اچانک سیلاب کا خطرہ بڑھ گیا ہے۔
ادارے نے اپر اور لوئر چترال، سوات، اپر دیر، کوہستان اور مانسہرہ کی ضلعی انتظامیہ کو پیشگی حفاظتی اقدامات کرنے کی ہدایت جاری کر دی ہے۔
پی ڈی ایم اے نے حساس گلیشیائی علاقوں میں ضلعی انتظامیہ کو ہائی الرٹ رہنے، مسلسل نگرانی کرنے اور ریسکیو اداروں، مشینری اور ہنگامی عملے کو ہر وقت تیار رکھنے کی ہدایت کی ہے تاکہ کسی بھی ممکنہ ہنگامی صورتحال سے فوری طور پر نمٹا جا سکے۔
