بھارت کی ریاست تلنگانہ میں ایک شخص کو مبینہ طور پر مالی لالچ کے باعث اپنے ہی خاندان کے چار افراد کے قتل کے الزام میں گرفتار کر لیا گیا ہے۔
بھارتی میڈیا اور پولیس کے مطابق ملزم اسلم، جو پیشے کے اعتبار سے کار ڈرائیور ہے، مالی مشکلات اور قرضوں کا شکار تھا۔ پولیس کا کہنا ہے کہ قتل کی واردات کا انکشاف 22 جون کو اس وقت ہوا جب پڑوسیوں نے ایک گھر سے شدید تعفن آنے کی اطلاع دی۔
پولیس کے مطابق اسلم نے ماضی میں اپنی اہلیہ کی خالہ حسینہ سے ایک لاکھ روپے قرض لیا تھا۔ حال ہی میں اس نے نئی گاڑی خریدنے کے لیے مزید قرض مانگا، تاہم حسینہ نے انکار کرتے ہوئے پہلے لیا گیا قرض واپس کرنے کا مطالبہ کیا۔
تحقیقات کے مطابق اسلم کی اہلیہ تبسم کی بھی حسینہ سے ذاتی رنجش تھی۔ پولیس کا دعویٰ ہے کہ ملزم نے واردات سے قبل آن لائن ویڈیوز دیکھ کر منصوبہ بنایا۔
پولیس کے مطابق 19 جون کو اسلم مبینہ طور پر حسینہ کے گھر پہنچا، جہاں اس نے پہلے حسینہ اور بعد ازاں ان کے شوہر اور دو بچوں کو قتل کر دیا۔ اس کے بعد گھر سے طلائی زیورات، زمین سے متعلق دستاویزات اور بینک کے کاغذات لے کر فرار ہو گیا
پولیس کے مطابق ملزم نے چوری شدہ سامان اپنے ایک دوست کی مدد سے حیدرآباد کے ایک جیولر کے پاس تقریباً 5 لاکھ 30 ہزار روپے میں گروی رکھا۔ اس مقدمے میں اسلم، اس کی اہلیہ، دوست اور سامان گروی رکھنے والے جیولر کو بھی گرفتار کر لیا گیا ہے، جبکہ مزید تحقیقات جاری ہیں۔
