کراچی: محکمہ موسمیات نے ملک کے مختلف حصوں میں یکم جولائی سے مون سون بارشوں کے آغاز کی پیشگوئی کر دی ہے، تاہم سندھ میں آئندہ چند روز تک بارش کے امکانات کم ہیں۔
ترجمان محکمہ موسمیات انجم نذیر کے مطابق مون سون کا آغاز شمال مشرقی پنجاب اور کشمیر سے ہونے کا امکان ہے، جبکہ یکم جولائی سے شمالی علاقوں اور پنجاب کے شمال مشرقی حصوں میں بارشیں متوقع ہیں
انجم نذیر نے بتایا کہ سندھ میں فی الحال مون سون کا آغاز ہوتا نظر نہیں آ رہا اور صوبے میں کم از کم 5 جولائی تک بارش کا کوئی واضح امکان موجود نہیں۔
ترجمان کے مطابق خلیج بنگال میں بننے والا کم دباؤ کراچی سمیت سندھ کے بعض علاقوں میں بارش کا سبب بن سکتا ہے، تاہم رواں مون سون سیزن کے دوران کراچی اور سندھ میں معمول سے کم بارشیں ہونے کا امکان ہے۔
انہوں نے مزید بتایا کہ بھارت میں بھی جون کے مہینے کے دوران معمول کے مقابلے میں 43 فیصد کم بارش ریکارڈ کی گئی ہے۔
