برینٹ اور امریکی خام تیل سستا، اوپیک مارکیٹ بھی نیچے آگئی
عالمی منڈی میں خام تیل کی قیمتوں میں کمی کا سلسلہ جاری ہے اور تازہ اعداد و شمار کے مطابق بین الاقوامی مارکیٹ میں تیل کی قیمتوں میں مزید 4.5 فیصد تک کمی ریکارڈ کی گئی ہے۔
رپورٹس کے مطابق امریکی خام تیل کی قیمت کم ہو کر 68 ڈالر 65 سینٹ فی بیرل جبکہ برینٹ کروڈ آئل 71 ڈالر 52 سینٹ فی بیرل پر آگیا ہے۔ اسی طرح ابوظبی بینچ مارک مربان کروڈ کی قیمت بھی کم ہو کر 67 ڈالر 50 سینٹ فی بیرل ریکارڈ کی گئی ہے۔
عالمی منڈی میں خام تیل کی قیمتیں ایک بار پھر جنگ سے پہلے کی سطح کے قریب پہنچ گئی ہیں، تاہم مقامی سطح پر صارفین کو اس کا فوری ریلیف ملنے کے امکانات محدود دکھائی دے رہے ہیں۔
اطلاعات کے مطابق آئندہ ہفتے بھی پیٹرول 299 روپے 50 پیسے جبکہ ہائی اسپیڈ ڈیزل 311 روپے 47 پیسے فی لیٹر برقرار رہنے کا امکان ہے۔
رواں سال 28 فروری کو ایران پر حملوں سے قبل برینٹ کروڈ آئل کی قیمت تقریباً 70 ڈالر 89 سینٹ جبکہ امریکی خام تیل 66 سے 70 ڈالر فی بیرل کے درمیان تھا۔ اس سے قبل 16 فروری کو حکومت نے پندرہ روزہ قیمتوں کے تعین میں پیٹرول 258 روپے 17 پیسے اور ہائی اسپیڈ ڈیزل 275 روپے 70 پیسے مقرر کیا تھا۔
