بھارت کی اپوزیشن جماعت کانگریس کی رہنما سونیا گاندھی نے اپنی نئی کتاب میں 1984 کے بھارتی فسادات کو ملک کی تاریخ کا ایک افسوسناک اور شرمناک باب قرار دیا ہے، جس پر حکمران جماعت بھارتیہ جنتا پارٹی (بی جے پی) نے کانگریس کو شدید تنقید کا نشانہ بنایا ہے۔
خبر رساں ادارے رائٹرز کے مطابق سونیا گاندھی کی یادداشتوں پر مشتمل کتاب ’بیلونگنگ ‘ 10 نومبر کو شائع ہوئی، جس کے بعد دونوں بڑی سیاسی جماعتوں کے درمیان ایک نیا تنازع کھڑا ہوگیا ہے۔
بی جے پی نے الزام عائد کیا ہے کہ سونیا گاندھی اپنی کتاب کے ذریعے کانگریس کی ماضی کی سیاسی غلطیوں اور تاریخی ذمہ داریوں پر پردہ ڈالنے کی کوشش کر رہی ہیں۔
کتاب کی اشاعت کے بعد بھارتی سوشل میڈیا پر بھی بحث چھڑ گئی ہے، جہاں صارفین کی جانب سے اس کے حق اور مخالفت میں مختلف آرا سامنے آرہی ہیں۔ بھارتی اخبارات نے بھی کتاب کو نمایاں کوریج دیتے ہوئے گزشتہ پانچ دہائیوں کے اہم واقعات سے متعلق مختلف اقتباسات شائع کیے ہیں۔
یہ سیاسی تنازع ایسے وقت میں سامنے آیا ہے جب بھارت کی اہم ریاستوں میں انتخابات قریب ہیں۔
