حکومت نے شہریوں کو گھر بیٹھے پاسپورٹ اپلائی کرنے کی سہولت فراہم کرنے کا فیصلہ کر لیا ہے، جس کے تحت پاسپورٹ سروسز کو مزید جدید اور آسان بنانے کیلئے اہم اقدامات کیے جا رہے ہیں۔ اس حوالے سے ڈی جی پاسپورٹس محمد علی رندھاوا کی زیرِ صدارت ایک اہم اجلاس منعقد ہوا جس میں نادرا کی ٹیکنیکل ٹیم نے بھی شرکت کی۔ اجلاس کے دوران مختلف تجاویز اور اصلاحات پر غور کیا گیا جبکہ متعدد اہم فیصلوں کی منظوری بھی دی گئی۔
اجلاس میں پاسپورٹ کے موجودہ نظام کا تفصیلی جائزہ لیا گیا اور اسے جدید تقاضوں سے ہم آہنگ بنانے کیلئے نئی ٹیکنالوجی کے استعمال پر تبادلہ خیال کیا گیا۔ حکام کے مطابق آن لائن سہولت متعارف ہونے سے شہریوں کو پاسپورٹ دفاتر کے چکر لگانے میں کمی آئے گی اور خدمات کی فراہمی مزید تیز اور مؤثر ہو سکے گی۔
