گلگت بلتستان اسمبلی انتخابات کے لیے انتخابی مہم ختم ہو گئی ہے، جبکہ 7 جون کو 24 نشستوں پر پولنگ ہوگی۔ انتخابات میں 403 امیدوار میدان میں ہیں اور تقریباً 9 لاکھ 58 ہزار ووٹر اپنا حقِ رائے دہی استعمال کریں گے، جبکہ سیکیورٹی کے سخت انتظامات بھی کیے گئے ہیں۔
گلگت بلتستان اسمبلی کے انتخابات کے لیے پولنگ عملے اور انتخابی سامان کی ترسیل آج مکمل کی جائے گی، جبکہ 24 نشستوں پر پولنگ 7 جون کو منعقد ہوگی۔
انتخابات کے موقع پر سیکیورٹی کے سخت انتظامات کیے گئے ہیں۔ حکام کے مطابق پولنگ اسٹیشنز پر مقامی پولیس اور گلگت بلتستان اسکاؤٹس کے اہلکار تعینات کیے جائیں گے تاکہ ووٹنگ کا عمل پرامن ماحول میں مکمل ہو سکے۔
اعداد و شمار کے مطابق مجموعی طور پر 9 لاکھ 58 ہزار 480 ووٹرز اپنا حقِ رائے دہی استعمال کریں گے۔ انتخابات میں 396 مرد اور 8 خواتین سمیت مجموعی طور پر 404 امیدوار میدان میں ہیں۔
سیاسی جماعتوں کے امیدواروں میں پاکستان پیپلز پارٹی کے 23، پاکستان مسلم لیگ (ن) کے 22، استحکام پاکستان پارٹی کے 15، پاکستان مسلم لیگ کے 11 اور جمعیت علمائے اسلام (ف) کے 9 امیدوار شامل ہیں۔
اسی طرح مجلس وحدت المسلمین کے 7، جماعت اسلامی اور متحدہ قومی موومنٹ کے 6، 6 امیدوار انتخابی دوڑ میں حصہ لے رہے ہیں، جبکہ 266 آزاد امیدوار بھی قسمت آزما رہے ہیں۔
