آئندہ مالی سال 2026-27 کے بجٹ میں سرکاری ملازمین کی تنخواہوں میں 10 سے 15 فیصد اضافے کی تجویز زیر غور ہے۔ ذرائع کے مطابق حتمی فیصلہ وزیراعظم شہباز شریف اتحادی جماعتوں سے مشاورت اور دستیاب مالی وسائل کا جائزہ لینے کے بعد کریں گے۔
وفاقی حکومت نے آئندہ مالی سال 2026-27 کے بجٹ میں سرکاری ملازمین کی تنخواہوں میں 10 سے 15 فیصد اضافے کی تجویز زیر غور لانے کا فیصلہ کیا ہے۔
رپورٹس کے مطابق وزیراعظم شہباز شریف کی زیر صدارت وزیراعظم ہاؤس میں ہونے والے ایک غیر رسمی اجلاس میں نئے مالی سال کے بجٹ سے متعلق مختلف امور پر مشاورت کی گئی۔ اجلاس میں بالخصوص پبلک سیکٹر ڈویلپمنٹ پروگرام (پی ایس ڈی پی)، ٹیکسز، تنخواہوں اور پنشن میں ممکنہ اضافے پر غور کیا گیا۔
ذرائع کے مطابق وفاقی وزیر خزانہ نے وزیراعظم کو بجٹ کے اہم نکات پر بریفنگ دیتے ہوئے افراطِ زر کی موجودہ شرح کے تناظر میں سرکاری ملازمین کی تنخواہوں میں 10 سے 15 فیصد اضافے کی تجویز پیش کی۔
تاہم وزیراعظم شہباز شریف نے ہدایت کی ہے کہ دستیاب مالی وسائل اور متوقع آمدن کو مدنظر رکھتے ہوئے یہ جائزہ لیا جائے کہ ملازمین کو کس حد تک ریلیف فراہم کیا جا سکتا ہے۔
ذرائع کا مزید کہنا ہے کہ سرکاری ملازمین کی تنخواہوں میں اضافے سے متعلق حتمی فیصلہ وزیراعظم اتحادی جماعتوں سے مشاورت کے بعد کریں گے۔
