وفاقی وزیر برائے منصوبہ بندی احسن اقبال نے واضح کیا ہے کہ کراچی کو وفاق کے ماتحت کرنے کی کوئی تجویز زیر غور نہیں ہے۔
جیو نیوز کے پروگرام نیا پاکستان میں گفتگو کرتے ہوئے احسن اقبال نے کہا کہ موجودہ این ایف سی ایوارڈ کے تحت صوبوں کے ساتھ مالی وسائل کی تقسیم کے باعث وفاق کو مختلف چیلنجز کا سامنا ہے۔ ان کا کہنا تھا کہ اسی نظام کی وجہ سے بعض اسٹریٹجک اور قومی اہمیت کے ترقیاتی منصوبوں کی تکمیل میں بھی مشکلات پیش آ رہی ہیں۔
انہوں نے کہا کہ حکومت بینظیر انکم سپورٹ پروگرام کو ختم کرنے کی حامی نہیں، تاہم یہ تجویز ضرور زیر غور ہے کہ پروگرام سے مستفید ہونے والے افراد کو ان کے متعلقہ صوبائی حکومتیں فنڈز فراہم کریں، کیونکہ 18ویں آئینی ترمیم کے تحت غربت کے خاتمے سے متعلق پروگرام صوبوں کی ذمہ داری ہیں۔
کراچی کی آئینی حیثیت سے متعلق ایک سوال کے جواب میں وفاقی وزیر نے دوٹوک مؤقف اختیار کرتے ہوئے کہا کہ شہر کو وفاق کے ماتحت کرنے سے متعلق کوئی تجویز زیر غور نہیں ہے۔
