قومی ایئر لائن (پی آئی اے) کے چیئرمین بورڈ آف ڈائریکٹرز اسلم آر خان انتقال کر گئے۔ پی آئی اے حکام کے مطابق وہ گزشتہ کئی روز سے علیل تھے اور طبیعت ناساز ہونے پر چند دن قبل انہیں ایک نجی اسپتال منتقل کیا گیا تھا۔
اسلم آر خان گزشتہ چھ دہائیوں سے پی آئی اے سے وابستہ تھے اور ادارے کی ترقی و استحکام میں ان کا اہم کردار رہا۔ پی آئی اے کی تنظیم نو اور اسے دوبارہ منافع بخش بنانے کے لیے کیے گئے متعدد اہم فیصلوں میں ان کی قیادت نمایاں رہی۔
سی ای او پی آئی اے نے اسلم آر خان کے انتقال پر گہرے دکھ اور افسوس کا اظہار کرتے ہوئے کہا کہ ان کے انتقال سے پوری پی آئی اے فیملی سوگوار ہے۔ ان کا کہنا تھا کہ مرحوم کے ساتھ کام کرنا اعزاز کی بات تھی اور وہ مشکل حالات میں بروقت فیصلے کرنے کی صلاحیت رکھتے تھے۔
مرحوم کی نماز جنازہ آج بعد نماز جمعہ ان کی رہائش گاہ خیابانِ غازی، ڈیفنس کراچی میں ادا کی جائے گی۔
