سلام آباد: پاکستان کا تجارتی خسارہ رواں مالی سال کے پہلے 11 ماہ کے دوران تاریخ کی بلند ترین سطح پر پہنچ گیا، جہاں جولائی سے مئی تک خسارہ 34 ارب 75 کروڑ ڈالر ریکارڈ کیا گیا۔
ادارہ شماریات کے جاری کردہ اعداد و شمار کے مطابق مالی سال کے ابتدائی 11 ماہ میں پاکستان کی مجموعی برآمدات 27 ارب 90 کروڑ ڈالر سے تجاوز کر گئیں، جبکہ اسی عرصے کے دوران درآمدات کا حجم 62 ارب 66 کروڑ ڈالر سے زیادہ رہا۔
رپورٹ کے مطابق گزشتہ مالی سال کے اسی عرصے کے مقابلے میں برآمدات میں 5.61 فیصد کمی ریکارڈ کی گئی، جبکہ درآمدات میں 5.94 فیصد اضافہ ہوا۔ گزشتہ مالی سال جولائی تا مئی کے دوران درآمدات 59 ارب 14 کروڑ ڈالر سے زائد تھیں۔
ماہانہ بنیادوں پر مئی 2026 میں برآمدات میں نمایاں بہتری دیکھی گئی۔ اپریل کے مقابلے میں مئی کے دوران برآمدات میں 9.59 فیصد اضافہ ریکارڈ کیا گیا۔ دوسری جانب مئی میں درآمدات اپریل کے مقابلے میں 21.55 فیصد کم رہیں۔
سالانہ بنیادوں پر بھی مئی کے مہینے میں برآمدات میں بہتری دیکھی گئی، جو گزشتہ مالی سال کے مئی کے مقابلے میں 1.26 فیصد زیادہ رہیں۔ اسی عرصے میں درآمدات میں 6.63 فیصد کمی ریکارڈ کی گئی۔
ماہرین کے مطابق درآمدات میں مسلسل اضافے اور برآمدات میں کمی کے باعث تجارتی خسارہ بڑھا ہے، جو ملکی معیشت اور زرمبادلہ کے ذخائر کے لیے ایک اہم چیلنج بن سکتا ہے۔
