کوئٹہ: حکومت بلوچستان نے تعلیمی شعبے میں اہم اصلاحات کا اعلان کرتے ہوئے پرائمری سطح پر اسکول یونیفارم کی شرط ختم کرنے کی منظوری دے دی ہے، جبکہ شرح خواندگی میں اضافے کے لیے 900 اسکولوں میں ڈبل شفٹ تدریسی نظام متعارف کرانے کا فیصلہ بھی کیا گیا ہے۔
یہ فیصلے وزیراعلیٰ بلوچستان سرفراز بگٹی کی زیرصدارت ہونے والے ایک اعلیٰ سطحی اجلاس میں کیے گئے، جس میں صوبے میں تعلیمی ترقی اور خواندگی کے فروغ کے لیے مختلف تجاویز کا جائزہ لیا گیا۔
اجلاس میں فیصلہ کیا گیا کہ پرائمری سطح پر یونیفارم کی لازمی شرط ختم کی جائے تاکہ معاشی مشکلات کے شکار خاندانوں کے بچوں کی تعلیم تک رسائی آسان بنائی جا سکے۔
اس کے علاوہ صوبے بھر میں 900 اسکولوں میں ڈبل شفٹ تدریسی عمل شروع کرنے کی منظوری بھی دی گئی، جس کا مقصد زیادہ سے زیادہ بچوں کو تعلیمی سہولیات فراہم کرنا اور شرح خواندگی میں اضافہ کرنا ہے۔
اس موقع پر وزیراعلیٰ سرفراز بگٹی نے کہا کہ تمام فعال سرکاری اسکولوں میں “ٹاٹ کلچر” کا خاتمہ کیا جائے گا اور ہر اسکول کو طلبہ کے لیے ڈیسک فراہم کیے جائیں گے تاکہ تعلیمی ماحول کو بہتر بنایا جا سکے۔
انہوں نے کہا کہ حکومت بلوچستان تعلیمی شعبے کی بہتری اور جدید سہولیات کی فراہمی کے لیے عملی اقدامات جاری رکھے گی۔
