حکومت نئے مالی سال 2026-27 کے بجٹ میں تنخواہ دار طبقے کو تقریباً 50 ارب روپے تک ٹیکس ریلیف فراہم کرنے پر غور کر رہی ہے۔ ذرائع کے مطابق انکم ٹیکس سلیب کی تعداد 6 سے بڑھا کر 8 کیے جانے کی تجویز زیر غور ہے تاکہ مختلف آمدنی رکھنے والے افراد کو مناسب سہولت دی جا سکے۔
ذرائع کا کہنا ہے کہ ماہانہ ایک لاکھ 83 ہزار روپے سے زائد آمدن رکھنے والے افراد کو بھی ریلیف دینے کی تجاویز شامل ہیں۔ مجوزہ منصوبے کے تحت ماہانہ 2 لاکھ 67 ہزار روپے تک آمدن رکھنے والوں کے لیے انکم ٹیکس کی شرح میں 5 فیصد کمی کی سفارش کی گئی ہے، جس کے بعد اس سلیب پر ٹیکس 25 فیصد سے کم ہو کر 20 فیصد تک آ سکتا ہے۔ اس اقدام سے تقریباً 4 لاکھ ملازمین کے مستفید ہونے کا امکان ظاہر کیا جا رہا ہے۔
اس کے علاوہ ماہانہ 4 لاکھ 67 ہزار روپے تک آمدن پر 29 فیصد اور 5 لاکھ 83 ہزار روپے تک آمدن پر 32 فیصد ٹیکس عائد کرنے کی تجاویز بھی زیر غور ہیں۔ تاہم 5 لاکھ 83 ہزار روپے سے زائد ماہانہ یا سالانہ 70 لاکھ روپے سے زیادہ آمدن رکھنے والوں کے لیے زیادہ سے زیادہ 35 فیصد ٹیکس شرح برقرار رکھنے کا امکان ہے۔ ذرائع کے مطابق سالانہ ایک کروڑ روپے سے زائد آمدن رکھنے والے افراد پر عائد سرچارج بھی ختم کیا جا سکتا ہے۔
