چیف آف ڈیفنس فورسز فیلڈ مارشل سید عاصم منیر سے لبنان کی مسلح افواج کے سربراہ جنرل روڈولف ہیکل نے جنرل ہیڈ کوارٹرز (جی ایچ کیو) میں ملاقات کی، جس میں باہمی دلچسپی کے امور، علاقائی سلامتی اور دفاعی تعاون سے متعلق مختلف پہلوؤں پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق جی ایچ کیو آمد پر لبنانی آرمی چیف کا پرتپاک استقبال کیا گیا، جبکہ مسلح افواج کے چاق و چوبند دستے نے انہیں گارڈ آف آنر پیش کیا۔
ملاقات کے دوران دونوں ممالک کی افواج کے درمیان پیشہ ورانہ روابط، تربیتی تعاون اور ادارہ جاتی تعلقات کو مزید مضبوط بنانے پر بھی گفتگو ہوئی۔ فیلڈ مارشل سید عاصم منیر نے لبنان کے ساتھ پاکستان کے دیرینہ دوستانہ تعلقات کو سراہتے ہوئے دفاعی تعاون کے فروغ کے عزم کا اعادہ کیا۔
اس موقع پر جنرل روڈولف ہیکل نے پاکستان کی مسلح افواج کی پیشہ ورانہ مہارت اور علاقائی امن و استحکام کے لیے ان کی خدمات کو خراجِ تحسین پیش کیا۔ انہوں نے بین الاقوامی امن مشنز میں پاک فوج کے کردار کو بھی سراہا۔ آئی ایس پی آر کے مطابق یہ دورہ دونوں ممالک کے درمیان عسکری تعلقات اور باہمی تعاون کو مزید مستحکم بنانے کے مشترکہ عزم کی عکاسی کرتا ہے۔
