سعودی عرب کے فرمانروا شاہ سلمان بن عبدالعزیز نے نیا شاہی فرمان جاری کرتے ہوئے وزارتِ انصاف سے وابستہ مختلف عدالتی اداروں میں 212 ججوں کی تقرری اور ترقی کی منظوری دے دی ہے۔
سعودی خبر رساں ایجنسی کے مطابق ان تقرریوں اور ترقیوں کا مقصد عدالتی نظام کی کارکردگی کو مزید مؤثر بنانا اور انصاف کی فراہمی کے عمل کو بہتر بنانا ہے۔ اس سلسلے میں وزیر انصاف اور سپریم جوڈیشل کونسل کے قائم مقام سربراہ ڈاکٹر ولید الصمعانی نے کہا کہ یہ اقدام عدالتی خدمات کے معیار کو بلند کرنے اور انصاف کے متلاشی افراد کے تجربے کو بہتر بنانے میں معاون ثابت ہوگا۔
انہوں نے سعودی قیادت کی مسلسل سرپرستی پر اظہارِ تشکر کرتے ہوئے کہا کہ یہ شاہی فرمان مملکت کے عدالتی نظام کو مزید مضبوط بنانے میں اہم کردار ادا کرے گا۔ ڈاکٹر ولید الصمعانی نے ترقی پانے اور نئے تعینات ہونے والے ججوں کے لیے نیک تمناؤں کا اظہار کرتے ہوئے امید ظاہر کی کہ وہ عدل و انصاف کے تقاضوں کو احسن طریقے سے پورا کریں گے۔
