پاکستانی گلوکار فلک شبیر نے وزیراعلیٰ پنجاب مریم نواز سے عوامی مقامات پر ڈریس کوڈ سے متعلق قانون سازی کی درخواست کر دی۔
فلک شبیر نے اپنے سوشل میڈیا اکاؤنٹ پر ایک اسٹوری شیئر کرتے ہوئے پنجاب حکومت کی جانب سے صوبے میں ویپنگ پر پابندی کے فیصلے کو سراہا اور اسے مثبت اقدام قرار دیا۔
انہوں نے اپنی پوسٹ میں لکھا کہ دو بیٹیوں کے والد ہونے کے ناطے وہ مریم نواز سے عاجزانہ درخواست کرتے ہیں کہ عوامی مقامات، بازاروں اور سڑکوں پر مختصر لباس پہننے کے حوالے سے بھی مناسب ضوابط متعارف کرائے جائیں۔ ان کا کہنا تھا کہ بصورت دیگر معاشرے کی ثقافتی اقدار متاثر ہو سکتی ہیں۔
فلک شبیر کی اس پوسٹ کے بعد سوشل میڈیا پر صارفین کی جانب سے مختلف آراء کا اظہار کیا جا رہا ہے، جہاں کچھ افراد نے ان کی تجویز کی حمایت کی جبکہ بعض نے اسے ذاتی آزادی سے جوڑتے ہوئے تنقید کا نشانہ بنایا۔
