وفاقی حکومت نے آئندہ بجٹ میں کراچی کے جاری اور نئے ترقیاتی منصوبوں کے لیے فنڈز مختص کرنے کا فیصلہ کیا ہے۔ بجٹ دستاویزات کے مطابق گرین لائن بس منصوبے کے لیے ایک ارب 98 کروڑ روپے رکھنے کی تجویز دی گئی ہے۔
دستاویزات میں شہر کے مختلف اضلاع میں سڑکوں، گلیوں، پانی کی فراہمی، نکاسی آب اور انفرااسٹرکچر کی بحالی کے متعدد منصوبوں کے لیے بھی فنڈز تجویز کیے گئے ہیں۔ ضلع غربی میں انفرااسٹرکچر کی بحالی کے لیے 26 کروڑ روپے، ناظم آباد اور لیاقت آباد میں ترقیاتی کاموں کے لیے 37 کروڑ روپے جبکہ لانڈھی، زمان ٹاؤن اور کورنگی میں سڑکوں، پانی، نکاسی آب اور کھیل کے میدانوں کے منصوبوں کے لیے 35 کروڑ روپے مختص کرنے کی تجویز ہے۔
اسی طرح ضلع وسطی میں بنیادی سہولیات کی بہتری کے لیے 4 کروڑ 50 لاکھ روپے اور ضلع کورنگی و ملیر میں سڑکوں، گلیوں اور نکاسی آب کے منصوبوں کے لیے 5 کروڑ روپے رکھنے کی سفارش کی گئی ہے۔
ذرائع کے مطابق وفاقی بجٹ میں کراچی کے لیے چند نئے منصوبے بھی شامل کیے جا رہے ہیں، جن میں جناح میڈیکل کمپلیکس اینڈ ریسرچ سینٹر کے لیے 40 کروڑ روپے، نیشنل ریسرچ اینڈ فرٹیلیٹی کیئر سینٹر کی اپ گریڈیشن کے لیے 39 کروڑ روپے اور نیشنل یونیورسٹی آف نرسنگ کے قیام کے لیے 5 کروڑ روپے مختص کرنے کی تجویز شامل ہے۔
