سندھ کے شہر شکارپور میں کچے کے علاقوں میں جاری نجات مہران پولیس آپریشن کے دوران 60 ڈاکوؤں نے سندھ حکومت کی سرینڈر پالیسی کے تحت ہتھیار ڈال کر خود کو قانون کے حوالے کر دیا۔
ایس ایس پی شکارپور محمد کلیم ملک کے مطابق سرینڈر کرنے والوں میں بیلو تیغانی، بڈانی، سبزوئی اور دیگر بدنام زمانہ جرائم پیشہ گروہوں کے ارکان شامل ہیں، جو قتل، ڈکیتی، رہزنی، اغوا برائے تاوان اور دیگر سنگین جرائم کے متعدد مقدمات میں مطلوب تھے۔
انہوں نے بتایا کہ ایک کروڑ روپے انعام یافتہ اور 102 مقدمات میں مطلوب خطرناک ڈاکو بیلو تیغانی نے بھی اپنے ساتھیوں سمیت سرینڈر کر دیا ہے، جسے نجات مہران آپریشن کی ایک اہم کامیابی قرار دیا جا رہا ہے۔
ڈاکوؤں کی سرینڈر کی مرکزی تقریب پولیس ہیڈکوارٹر گراؤنڈ شکارپور میں منعقد ہوئی، جس میں پولیس اور ضلعی انتظامیہ کے اعلیٰ حکام نے شرکت کی۔
