امریکا نے ایرانی فٹ بال ٹیم کو ورلڈ کپ مقابلوں میں شرکت کے لیے ویزے جاری کر دیے ہیں، تاہم تکنیکی اور انتظامی عملے کے بعض ارکان کو تاحال ویزے نہیں مل سکے۔
برطانوی خبر رساں ادارے سے گفتگو کرتے ہوئے وائٹ ہاؤس حکام نے تصدیق کی کہ ایرانی قومی فٹ بال ٹیم کو امریکا میں داخلے کے ویزے جاری کر دیے گئے ہیں تاکہ وہ ورلڈ کپ میں شرکت کر سکے۔
دوسری جانب ایرانی میڈیا کا دعویٰ ہے کہ ٹیم کے تکنیکی اور انتظامی عملے کے کچھ ارکان کو امریکی حکام کی جانب سے ورلڈ کپ ویزے جاری نہیں کیے گئے، جس کے باعث صورتحال پر سوالات اٹھ رہے ہیں۔
شیڈول کے مطابق ایران اپنی ورلڈ کپ مہم کا آغاز 15 جون کو لاس اینجلس میں گروپ جی کے میچ میں نیوزی لینڈ کے خلاف کرے گا۔ اس کے بعد ایرانی ٹیم بیلجیئم کا سامنا بھی لاس اینجلس میں کرے گی، جبکہ گروپ مرحلے کے ایک اور میچ میں سیاٹل میں مصر کے خلاف میدان میں اترے گی۔
