روہڑی میں وار مبارک درگاہ کے قریب دریائے سندھ میں نہاتے ہوئے ایک ہی خاندان کے تین کمسن بچے گہرے پانی میں ڈوب گئے، جن میں سے دو کی لاشیں نکال لی گئی ہیں جبکہ تیسرے بچے کی تلاش جاری ہے۔
تفصیلات کے مطابق ڈوبنے والے بچوں میں 10 سالہ آفتاب علی سولنگی، 5 سالہ علی حیدر اور 8 سالہ آیتہ سولنگی شامل ہیں۔ واقعے کے فوراً بعد مقامی غوطہ خوروں نے سرچ آپریشن شروع کرتے ہوئے 10 سالہ آفتاب علی سولنگی کی لاش دریا سے نکال لی تھی، تاہم رات کی تاریکی کے باعث ریسکیو کارروائیاں عارضی طور پر معطل کر دی گئی تھیں۔
آج صبح ریسکیو حکام اور مقامی افراد کی مشترکہ کوششوں سے دوبارہ سرچ آپریشن کا آغاز کیا گیا، جس کے دوران 5 سالہ علی حیدر کی لاش بھی دریائے سندھ سے برآمد کر لی گئی، جبکہ 8 سالہ آیتہ سولنگی کی تلاش کے لیے آپریشن تاحال جاری ہے۔
واضح رہے کہ چند روز قبل انتظامیہ نے شدید گرمی کے پیش نظر نہروں اور دریائے سندھ میں نہانے پر دفعہ 144 نافذ کرتے ہوئے پابندی عائد کی تھی، تاہم اس پر مؤثر عملدرآمد نہ ہونے کے باعث یہ افسوسناک واقعہ پیش آیا۔
