محکمہ موسمیات نے کراچی میں شدید ہیٹ ویو کی پیش گوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔ محکمہ کے مطابق آج سے 12 جون تک شہر میں درجہ حرارت 39 سے 42 ڈگری سینٹی گریڈ تک پہنچ سکتا ہے، جبکہ نمی کے تناسب میں اضافے کے باعث محسوس کیے جانے والا درجہ حرارت 50 سے 52 ڈگری سینٹی گریڈ تک ہو سکتا ہے۔
ڈپٹی ڈائریکٹر محکمہ موسمیات انجم نذیر ضیغم کے مطابق سمندری ہواؤں کے اثرات کے باعث ہوا میں نمی کا تناسب 50 فیصد سے کم نہیں ہو رہا، جس کی وجہ سے گرمی کی شدت اصل درجہ حرارت سے 8 سے 10 ڈگری زیادہ محسوس کی جا سکتی ہے۔ انہوں نے بتایا کہ ہواؤں کی رفتار کم ہونے سے شہر میں حبس اور گھٹن کی کیفیت برقرار رہنے کا امکان ہے۔
محکمہ موسمیات کے مطابق کراچی کا موجودہ درجہ حرارت 36 ڈگری سینٹی گریڈ جبکہ کم سے کم درجہ حرارت 29.5 ڈگری ریکارڈ کیا گیا ہے، اور دن کے اوقات میں پارہ 37 سے 39 ڈگری تک جا سکتا ہے۔ جنوب مغرب سے 15 کلومیٹر فی گھنٹہ کی رفتار سے ہوائیں چل رہی ہیں، جبکہ میدانی علاقوں میں گرد آلود ہواؤں اور آندھی کا بھی امکان ظاہر کیا گیا ہے۔
محکمہ موسمیات اور طبی ماہرین نے شہریوں کو مشورہ دیا ہے کہ وہ غیر ضروری طور پر دھوپ میں نکلنے سے گریز کریں اور پانی کا زیادہ استعمال یقینی بنائیں۔
