وفاقی وزیرخزانہ محمد اورنگزیب نے کہا ہے کہ سعودی عرب کی مالی معاونت پاکستان کی بیرونی مالی پوزیشن کو مزید مضبوط بنانے میں اہم کردار ادا کرے گی۔ انہوں نے یہ بات ورلڈ بینک اور آئی ایم ایف کے بہار اجلاس کے موقع پر موڈیز کے نمائندگان سے ملاقات کے دوران کہی، جہاں معاشی صورتحال اور عالمی مالیاتی منڈیوں میں واپسی کی حکمت عملی پر تفصیلی تبادلہ خیال کیا گیا۔
وزیرخزانہ نے بتایا کہ پاکستان نے یورو بانڈ کی ادائیگی کامیابی سے مکمل کر لی ہے اور تمام قرض دہندگان کے ساتھ ذمہ داریاں بروقت پوری کی جا رہی ہیں، جس سے عالمی اعتماد میں اضافہ ہو رہا ہے۔
انہوں نے مزید کہا کہ حکومت عالمی مالیاتی منڈیوں تک دوبارہ رسائی کے لیے درمیانی مدت کی حکمت عملی پر کام کر رہی ہے، جبکہ موجودہ علاقائی صورتحال کے تناظر میں توانائی کے شعبے میں بھی مؤثر اقدامات کیے جا رہے ہیں۔
محمد اورنگزیب کے مطابق معاشی استحکام کے لیے بین الاقوامی شراکت داری اور مالی نظم و ضبط کو برقرار رکھنا حکومت کی ترجیح ہے۔
