دبئی کا عالمی شہرت یافتہ لگژری ہوٹل برج العرب مرمت کے لیے 18 ماہ تک بند رکھنے کا اعلان کر دیا گیا ہے۔ خبر رساں اداروں کے مطابق یہ ہوٹل، جو اپنی منفرد کشتی نما ساخت اور شاندار ڈیزائن کے باعث دنیا بھر میں پہچانا جاتا ہے، اب ایک بڑے تزئین و آرائش منصوبے میں داخل ہو رہا ہے۔
رپورٹس کے مطابق 1999 میں افتتاح کے بعد یہ پہلا موقع ہوگا جب ہوٹل کی بڑے پیمانے پر مرمت کی جا رہی ہے۔ انتظامیہ کا کہنا ہے کہ اس دوران برج العرب کی منفرد ساخت کو برقرار رکھا جائے گا جبکہ اندرونی ڈیزائن اور آرکیٹیکچر کو جدید تقاضوں کے مطابق بہتر بنانے کے ساتھ اس کی اصل خوبصورتی بھی محفوظ رکھی جائے گی۔
یہ منصوبہ دبئی کی سیاحت اور لگژری ہاسپیٹیلٹی سیکٹر میں ایک اہم پیش رفت قرار دیا جا رہا ہے، جس کے بعد ہوٹل کو مزید جدید اور پرکشش انداز میں دوبارہ کھولا جائے گا۔
