کراچی کے علاقے ملیر میں منکی پاکس کا نیا کیس رپورٹ ہوا ہے جہاں ایک ہی خاندان کے دو افراد وائرس کا شکار ہوگئے ہیں۔ محکمہ صحت کے مطابق 42 سالہ شخص جو پہلے متاثر ہوا تھا، علاج کے بعد صحتیاب ہو کر گھر منتقل ہو چکا ہے، تاہم اب اس کی 41 سالہ اہلیہ میں بھی علامات ظاہر ہونے پر انہیں ہسپتال میں داخل کر لیا گیا ہے۔
ہسپتال ذرائع کا کہنا ہے کہ متاثرہ خاتون کو مکمل طبی سہولیات فراہم کی جا رہی ہیں اور ان کی حالت زیر نگرانی ہے۔ خوش آئند بات یہ ہے کہ متاثرہ خاندان کے بچوں میں اب تک منکی پاکس کی کوئی علامات سامنے نہیں آئی ہیں۔
محکمہ صحت کے مطابق رواں سال کراچی میں منکی پاکس کے کیسز کی مجموعی تعداد 4 ہو گئی ہے۔ صورتحال کے پیش نظر حکام نے صوبے بھر میں الرٹ جاری کرتے ہوئے حفاظتی اقدامات مزید سخت کرنے کی ہدایت دی ہے تاکہ وائرس کے پھیلاؤ کو روکا جا سکے۔
