اداکارہ طوبیٰ انوار نے کہا ہے کہ آج وہ زندگی میں جس مقام پر کھڑی ہیں، وہ ان کی مسلسل محنت، صبر اور اللہ کے فضل کا نتیجہ ہے۔ ایک انٹرویو میں انہوں نے اپنی ذاتی اور پیشہ ورانہ زندگی پر کھل کر بات کی۔
طوبیٰ کا کہنا تھا کہ زندگی میں کئی مراحل ایسے آئے جب تنقید اور مسائل کا سامنا رہا، لیکن اس وقت وہ خاموش رہیں کیونکہ وہ ذہنی طور پر تیار نہیں تھیں۔ انہوں نے کہا: “شاید میں اس وقت کمزور تھی، اس لیے جواب نہ دے سکی، لیکن آج جب سکون اور حوصلہ ملا ہے تو سمجھ آتا ہے کہ خاموشی بھی ایک طاقت ہے۔”
انہوں نے مزید کہا کہ بعض اوقات ہم دوسروں کی سوچ نہیں بدل سکتے، اور ایسی صورتحال میں انسان کے لیے سب سے اہم چیز اس کا ذہنی سکون ہوتا ہے۔ “جب نیت صاف ہو اور دل میں برائی نہ ہو تو اللہ خود راستے آسان کر دیتا ہے”، طوبیٰ نے کہا۔
اپنے شوبز کیرئیر کے بارے میں بات کرتے ہوئے ان کا کہنا تھا کہ لوگ سمجھتے ہیں کہ اداکار بننا آسان ہے، لیکن اصل میں یہ ایک مشکل راستہ ہے۔ “جب میں اس فیلڈ میں آئی تو حالات سازگار نہیں تھے، لیکن میں نے ہمت نہیں ہاری، اور آج جو کچھ بھی حاصل کیا ہے وہ اللہ کی مہربانی اور میری محنت کا نتیجہ ہے۔ جب آپ خود جواب نہیں دیتے، تو اللہ آپ کے لیے جواب دیتا ہے۔”
