الیکشن کمیشن گلگت بلتستان نے انتخابی بے ضابطگیوں سے متعلق شکایات کی روشنی میں 24 میں سے 5 حلقوں کے نتائج روکنے اور بعض پولنگ اسٹیشنز پر دوبارہ پولنگ کرانے کا فیصلہ کیا ہے۔
نوٹیفکیشن کے مطابق حلقہ جی بی اے 8 سکردو کے 10 پولنگ اسٹیشنز کے نتائج کالعدم قرار دیتے ہوئے 15 جون کو ری پولنگ کا حکم جاری کیا گیا ہے۔ یہ فیصلہ پیپلز پارٹی کے امیدوار سید محمد علی شاہ کی جانب سے انتخابی بے ضابطگیوں اور انتظامی مسائل سے متعلق درخواست پر کیا گیا۔
الیکشن کمیشن نے جی بی 15 دیامر ون، جی بی 16 دیامر ٹو اور جی بی 17 دیامر تھری داریل سمیت دیگر متاثرہ حلقوں کے نتائج بھی عارضی طور پر روک دیے ہیں۔ نوٹیفکیشن میں کہا گیا ہے کہ متعلقہ حلقوں میں دوبارہ پولنگ مکمل ہونے تک ریٹرننگ افسران پوسٹل بیلٹس نہیں کھولیں گے اور نہ ہی حتمی نتائج جاری کیے جائیں گے۔
چیف الیکشن کمشنر گلگت بلتستان راجہ شہباز کے مطابق تمام حلقوں کے حتمی نتائج ری پولنگ کے بعد مرتب کیے جائیں گے۔ انہوں نے اس موقع پر پرامن انتخابات کے انعقاد پر عوام کا شکریہ بھی ادا کیا۔
