کراچی: میئر کراچی مرتضیٰ وہاب نے اعلان کیا ہے کہ کورنگی نمبر 5 پر زیر تعمیر فلائی اوور 15 اگست کو ٹریفک کے لیے کھول دیا جائے گا۔
کونسل ہال میں ماہ ربیع الاول کے انتظامات کے حوالے سے منعقدہ اجلاس کی صدارت کرتے ہوئے مرتضیٰ وہاب نے کہا کہ ماہ ربیع الاول امت مسلمہ کے لیے انتہائی مقدس، بابرکت اور روحانی اہمیت کا حامل مہینہ ہے۔ ان کا کہنا تھا کہ اس موقع پر شہری سہولتوں کی فراہمی اور بلدیاتی انتظامات کو بہتر بنانا صرف سرکاری ذمہ داری نہیں بلکہ باعثِ سعادت بھی ہے۔
میئر کراچی نے کہا کہ ربیع الاول کے دوران صفائی، روشنی، ٹریفک اور دیگر شہری سہولتوں کی فراہمی کو یقینی بنانے کے لیے تمام متعلقہ ادارے مربوط انداز میں کام کریں گے۔
انہوں نے مزید کہا کہ ربیع الاول کے انتظامات ایک مقدس فریضہ ہیں اور انہیں علماء کرام کی مشاورت اور تعاون سے مزید مؤثر، منظم اور بہتر بنایا جائے گا۔
