کوئٹہ میں تیزاب گردی کا نشانہ بننے والی خاتون ڈاکٹر ماہ نور کے اہلخانہ نے بتایا ہے کہ ان کی بینائی محفوظ ہے اور ان کی حالت میں بہتری آ رہی ہے۔ جیو نیوز سے ٹیلیفونک گفتگو کرتے ہوئے اہلخانہ نے کہا کہ ڈاکٹر ماہ نور مکمل ہوش و حواس میں ہیں اور اہل خانہ سے بات چیت بھی کر رہی ہیں۔
اہلخانہ کے مطابق ڈاکٹر ماہ نور کے جسم پر موجود جلنے کے زخم سطحی نوعیت کے ہیں، جبکہ متاثرہ حصوں سے مردہ جلد ہٹانے کا عمل جاری ہے۔ انہوں نے بتایا کہ جلد کی پیوندکاری (گرافٹنگ) سے متعلق سرجریز مرحلہ وار کی جا رہی ہیں۔
اہلخانہ کا کہنا ہے کہ ڈاکٹر ماہ نور کی بینائی متاثر نہیں ہوئی اور ماہر ڈاکٹروں کی ٹیم ان کے علاج اور نگہداشت میں مصروف ہے۔
