کراچی: صوبائی ڈیزاسٹر مینجمنٹ اتھارٹی (پی ڈی ایم اے) سندھ نے 31 جولائی سے 2 اگست تک صوبے کے مختلف علاقوں میں بارشوں اور ممکنہ اربن فلڈنگ کے پیش نظر الرٹ جاری کر دیا ہے۔
ڈی جی پی ڈی ایم اے کے مطابق محکمہ موسمیات نے سندھ کے مختلف اضلاع میں گرج چمک کے ساتھ بارش کی پیشگوئی کی ہے۔ کراچی، حیدرآباد اور میرپورخاص میں تیز بارشوں کا امکان ظاہر کیا گیا ہے۔
الرٹ کے مطابق سکھر، لاڑکانہ، بدین، تھرپارکر، عمرکوٹ، سانگھڑ، خیرپور، جیکب آباد، شکارپور، گھوٹکی، کشمور اور قمبر شہدادکوٹ میں بھی بارش متوقع ہے۔
اس کے علاوہ ٹھٹہ، جامشورو، مٹیاری، ٹنڈو محمد خان، ٹنڈوالہ یار اور شہید بینظیر آباد میں بھی بارشوں کا امکان ظاہر کیا گیا ہے۔ پی ڈی ایم اے نے خبردار کیا ہے کہ شدید بارشوں کے باعث متعدد اضلاع کے نشیبی علاقوں میں پانی جمع ہونے اور اربن فلڈنگ کی صورتحال پیدا ہو سکتی ہے۔
