ملک بھر میں آٹے کی قیمتوں میں مزید اضافہ ریکارڈ کیا گیا ہے، جبکہ کراچی میں 20 کلو آٹے کا تھیلا 2800 روپے تک پہنچ کر سب سے مہنگا ہو گیا ہے۔ ادارہ شماریات کے مطابق مختلف شہروں میں آٹے کی قیمتوں میں نمایاں فرق دیکھا جا رہا ہے، جس سے شہریوں پر مہنگائی کا بوجھ مزید بڑھ گیا ہے۔
ملک میں آٹے کی قیمتوں میں مسلسل اضافے کے باعث 20 کلوگرام آٹے کے تھیلے کی قیمت کئی شہروں میں ریکارڈ سطح پر پہنچ گئی ہے، جبکہ کراچی کے شہری سب سے مہنگا آٹا خریدنے پر مجبور ہیں۔
ادارہ شماریات کی حالیہ دستاویزات کے مطابق کراچی میں 20 کلو آٹے کا تھیلا 2800 روپے میں فروخت ہو رہا ہے، جو ملک بھر میں سب سے زیادہ قیمت ہے۔ پشاور میں یہی تھیلا 2750 روپے، اسلام آباد میں 2733 روپے جبکہ راولپنڈی میں 2707 روپے تک پہنچ چکا ہے۔
رپورٹ کے مطابق کوئٹہ اور بنوں میں بھی آٹے کی قیمت 2700 روپے تک جا پہنچی ہے۔ اسی طرح حیدرآباد میں 20 کلو آٹے کا تھیلا 2600 روپے، خضدار اور لاڑکانہ میں 2400 روپے، فیصل آباد میں 2350 روپے اور گوجرانوالہ میں 2333 روپے میں دستیاب ہے۔
دوسری جانب ملتان اور لاہور میں بھی آٹے کے نرخوں میں اضافہ ریکارڈ کیا گیا ہے۔ دستاویزات کے مطابق ملتان میں 20 کلو آٹے کا تھیلا 2267 روپے جبکہ لاہور میں 2250 روپے میں فروخت ہو رہا ہے۔
ماہرین معاشیات کا کہنا ہے کہ گندم کی ترسیل میں رکاوٹیں اور ذخیرہ اندوزی کے خلاف مؤثر اقدامات نہ ہونے کے باعث آٹے کی قیمتیں قابو سے باہر ہو رہی ہیں، جس سے عام شہریوں پر مہنگائی کا بوجھ مزید بڑھ گیا ہے۔
