اقوام متحدہ میں پاکستان کے مستقل مشن کے قونصلر گل قیصر سروانی نے کہا ہے کہ جموں و کشمیر ایک بین الاقوامی طور پر تسلیم شدہ تنازع ہے جو سلامتی کونسل کے ایجنڈے پر موجود ہے۔ انہوں نے بھارت پر حقائق مسخ کرنے کا الزام عائد کرتے ہوئے کہا کہ اس تنازع کی تاریخی اور قانونی حیثیت کو تبدیل نہیں کیا جا سکتا۔
اقوام متحدہ میں پاکستان کے مستقل مشن کے قونصلر گل قیصر سروانی نے کہا ہے کہ بھارت مقبوضہ کشمیر کے حوالے سے حقائق سے انکار، توجہ ہٹانے اور اقوام متحدہ کو گمراہ کرنے کے بجائے زمینی حقائق کا سنجیدگی سے جائزہ لے۔
سلامتی کونسل کی سالانہ رپورٹ پر جنرل اسمبلی میں ہونے والے مباحثے کے دوران بھارتی نمائندے کے ریمارکس کا جواب دیتے ہوئے گل قیصر سروانی نے کہا کہ جموں و کشمیر ایک بین الاقوامی طور پر تسلیم شدہ تنازع ہے، جو بدستور اقوام متحدہ کی سلامتی کونسل کے ایجنڈے پر موجود ہے۔
انہوں نے کہا کہ حقائق کو مسخ کرنے یا ابہام پیدا کرنے کی کوئی بھی کوشش اس تنازع کی تاریخی، قانونی اور بین الاقوامی حیثیت کو تبدیل نہیں کر سکتی۔
پاکستانی قونصلر کا مزید کہنا تھا کہ جموں و کشمیر نہ کبھی بھارت کا نام نہاد اٹوٹ انگ تھا، نہ ہے اور نہ ہی کبھی ہوگا۔ ان کے مطابق بھارت کو مقبوضہ کشمیر کے معاملے پر اقوام متحدہ اور عالمی برادری کے سامنے حقائق کو تسلیم کرنا چاہیے۔
