سعودی عرب: 40 لاکھ عمرہ ویزوں کا اجراء کیا جا چکا ہے

سعودی عرب میں عمرہ سیزن کے آغاز سے اب تک 40 لاکھ عمرہ ویزوں کا اجراء کیا جا چکا ہے، پاکستان سے آنے والے عمرہ زائرین کی تعداد سب سے زیادہ رہی جبکہ دوسرے نمبر پر انڈونیشیا کے زائرین رہے۔
عرب خبر رساں ادارے کی رپورٹ کے مطابق رواں برس عمرہ سیزن کا آغاز حج کے فوری بعد جون 2025 میں کردیا گیا تھا۔ گزشتہ 5 ماہ کے دوران عمرہ زائرین کی تعداد میں ریکارڈ اضافہ دیکھنے کو ملا تھا۔
رپورٹس کے مطابق بیرون مملکت سے آنے والے زائرین کا تعلق مختلف ممالک سے ہے جن میں تیسرے نمبر پر انڈیا بعد ازاں عراق کے زائرین رہے پانچویں نمبر پر مصر رہا۔
وزارت حج وعمرہ کے مطابق بیشتر ممالک کے لیے ’نسک‘ پورٹل پر عمرہ ویزے کی سہولت بھی شروع کررکھی ہے جس کے ذریعے یورپی ممالک سے آنے والے زائرین اپنی مرضی کا عمرہ پیکیج باسانی حاصل کرسکتے ہیں۔
سعودی عرب میں عمرہ کے لیے آنے والے بیشتر زائرین جدہ یا براہ راست مدینہ منورہ آتے ہیں جس کے بعد وہ عمرہ کی ادائیگی کیلیے ٹرین یا بسوں کے ذریعے مکہ مکرمہ روانہ ہوجاتے ہیں۔
سعودی عرب، تیل کے علاوہ دیگر شعبوں کی آمدن میں بڑا اضافہ
وزارت حج وعمرہ کے مطابق زائرین کی سہولت کیلیے فراہم کی جانے والی ڈیجیٹل خدمات کے دائرے کو وسیع کیا جارہا ہے جس میں مختلف زبانوں میں رہنما ضوابط بھی جاری کیے جائیں گے۔