پاکستان اور ایران نے دوطرفہ ریلوے تعاون کو مزید فروغ دینے پر اتفاق کر لیا ہے۔ اس حوالے سے وفاقی وزیرِ ریلوے نے پاکستان میں ایران کے سفیر ڈاکٹر رضا امیری مقدم سے ملاقات کی، جس میں دونوں ممالک کے درمیان برادرانہ تعلقات کو مزید مضبوط بنانے کے عزم کا اظہار کیا گیا۔
ملاقات کے دوران پاکستان اور ایران کے درمیان ریلوے رابطوں پر تفصیلی تبادلۂ خیال کیا گیا، خصوصاً تفتان–زاہدان ریلوے روٹ اور آئی ٹی آئی (اسلام آباد–تہران–استنبول) فریٹ ٹرین منصوبے پر پیشرفت کا جائزہ لیا گیا۔ حکام کے مطابق ریلوے تعاون میں اضافے سے نہ صرف دوطرفہ تجارت کو فروغ ملے گا بلکہ خطے میں تجارتی اور سفری روابط بھی مزید مستحکم ہوں گے۔
