پاکستان میں غیر ملکی سرمایہ کاری کی راہ ہموار ہوگئی

ایس آئی ایف سی کی کوششوں سے پاکستان میں غیر ملکی سرمایہ کاری کی راہ ہموار ہوگئی ، پولینڈ نے پاکستان میں تیل وگیس کے شعبے میں سرمایہ کاری بڑھانے کا عندیہ دے دیا۔
تفصیلات کے مطابق پولینڈ نے پاکستان میں تیل و گیس کے شعبے سمیت مختلف اقتصادی میدانوں میں سرمایہ کاری بڑھانے اور دوطرفہ تعلقات کو مزید مستحکم بنانے کے عزم کا اظہار کیا ہے۔
اس حوالے سے پولینڈ کے سفیر میسیج پسارسکی اور وزیر خزانہ محمد اورنگزیب کے درمیان اہم ملاقات ہوئی۔ ملاقات میں دونوں ممالک کے درمیان تجارتی تعلقات کے استحکام اور نئے شعبوں میں شراکت داری کے امکانات پر تبادلہ خیال کیا گیا۔
پولینڈ کے سفیر نے بتایا کہ تیل و گیس کے شعبے میں 100 ملین ڈالر سے زائد کی سرمایہ کاری میں اضافہ متوقع ہے اور پولینڈ پاکستان کے ساتھ اقتصادی تعاون کو وسعت دینے کے لیے نئے شعبوں میں بھی شراکت داری چاہتا ہے۔
سفیر میسیج پسارسکی نے اعلان کیا کہ پولینڈ پاکستان کے ساتھ تعلقات کو مزید مستحکم بنانے کے لیے اعلیٰ سطح کا سیاسی وفد بھیجے گا۔
انہوں نے بتایا کہ یہ فیصلہ سیلاب متاثرین کے لیے امدادی سامان فراہم کرنے کی کارروائیوں کے تسلسل میں کیا گیا ہے۔
ایس آئی ایف سی کے پلیٹ فارم کے ذریعے پاکستان میں غیر ملکی سرمایہ کاری کی راہ ہموار کی جا رہی ہے، جس سے دونوں ممالک کے درمیان اقتصادی اور تجارتی تعاون میں مزید اضافہ متوقع ہے