کراچی میں میٹرک بورڈ کے امتحانات کے دوران وزیر بورڈ اسماعیل راہو نے لیاری کے ایک اسکول کا اچانک دورہ کیا، جہاں بڑی تعداد میں طلبہ و طالبات کو نقل کرتے ہوئے پایا گیا۔
دورے کے دوران امیدواروں سے بڑی تعداد میں موبائل فون اور نقل کا مواد برآمد کیا گیا، جبکہ چھوٹے کلاس رومز میں ایک ڈیسک پر دو دو طالبات کو بٹھایا گیا تھا۔
حکام کے مطابق ایک اسپیشل روم میں صرف 4 طالبات کو موبائل فون اور نقل کے مواد کی مدد سے پرچہ دیتے ہوئے پایا گیا۔ وزیر بورڈ نے جب طلبہ کی کاپیاں چیک کیں تو تمام پرچے حرف بہ حرف ایک جیسے تھے۔
اسماعیل راہو نے سینٹر سپرنٹنڈنٹ سے وضاحت طلب کی، تاہم وہ تسلی بخش جواب نہ دے سکے۔
بعد ازاں وزیر بورڈ نے ہدایت جاری کی کہ بورڈ انتظامیہ فوری طور پر امتحانی سینٹر منسوخ کرے اور سینٹر سپرنٹنڈنٹ کو برطرف کیا جائے۔
