کراچی کے جناح پوسٹ گریجویٹ میڈیکل سینٹر میں گائنی اینڈ آبسٹیٹرکس کے جدید ماڈیولر آپریشن تھیٹرز کا باقاعدہ افتتاح کر دیا گیا۔ افتتاحی تقریب میں وزیر صحت سندھ ڈاکٹر عذرا فضل پیچوہو نے شرکت کی اور جدید او ٹی بلاک کا افتتاح کیا۔
اس موقع پر میڈیا سے گفتگو کرتے ہوئے ڈاکٹر عذرا فضل پیچوہو نے کہا کہ گائنی وارڈ میں جدید طبی مشینری سے لیس آپریشن تھیٹرز کو فعال کر دیا گیا ہے، جس سے مریضوں کو بروقت اور معیاری طبی سہولیات کی فراہمی ممکن ہو سکے گی۔ انہوں نے بتایا کہ او ٹی اور ایمرجنسی سروسز کا باقاعدہ آغاز ہو چکا ہے، جبکہ مستقبل قریب میں آئی سی یو سروسز بھی شروع کی جائیں گی۔
وزیر صحت سندھ کے مطابق نوزائیدہ بچوں کے لیے خصوصی این آئی سی یو یونٹ کے قیام کی منصوبہ بندی بھی جاری ہے۔ انہوں نے کہا کہ جناح اسپتال میں مختلف امراض کے مریضوں کے علاج کی سہولیات میں مسلسل اضافہ کیا جا رہا ہے اور جدید طبی آلات کے ذریعے علاج کے معیار کو بہتر بنایا جا رہا ہے۔
ڈاکٹر عذرا فضل پیچوہو نے مزید بتایا کہ اسپتال میں طبی عملے کی کمی کو پورا کرنے کے لیے مزید بھرتیوں کا فیصلہ کیا گیا ہے، جبکہ حالیہ عرصے میں بھی کچھ تقرریاں کی جا چکی ہیں۔ ان کا کہنا تھا کہ ماضی میں بھرتیوں کے عمل کو قانونی چیلنجز کا سامنا رہا، تاہم اب اس عمل کو مزید تیز کیا جا رہا ہے۔
