کراچی : کورنگی سنگر چورنگی پر تیز رفتار ڈمپر نے موٹر سائیکل سوار کو کچل ڈالا ، واقعے کے بعد مشتعل افراد نے ڈمپر کو آگ لگا دی۔
تفصیلات کے مطابق کراچی میں ہیوی ٹریفک کی زد میں آکر شہریوں کی اموات کا سلسلہ تھم نہ سکا۔
کورنگی سنگر چورنگی پر تیز رفتار ڈمپر کی ٹکر سے موٹر سائیکل سوار جاں بحق ہوگیا، حادثے کے بعد مشتعل افراد نے ڈمپر کو آگ لگا دی، تاہم فائر بریگیڈ کی ٹیم نے موقع پر پہنچ کر آگ پر قابو پا لیا۔
ریسکیو حکام نے بتایا کہ حادثے میں جاں بحق ہونے والے شہری کی شناخت محمد اقرار کے نام سے ہوئی ہے، جبکہ دو افراد معمولی زخمی ہوئے تاہم جاں بحق شخص کی لاش کو ضابطے کی کارروائی کے لیے جناح اسپتال منتقل کردیا گیا۔
پولیس کا کہنا ہے کہ ڈمپر ڈرائیور گاڑی چھوڑ کر موقع سے فرار ہوگیا، جس کی تلاش جاری ہے، جبکہ حادثے میں ملوث ڈمپر کو تحویل میں لے لیا گیا ہے۔
واقعے کے بعد جائے حادثہ پر کے راٹ کی ٹیم پہنچ گئی جبکہ ڈمپر مالکان بھی جائے حادثہ پر موجود تھے۔
کےراٹ انچارج اکمل رائے نے بتایا حادثے کے تمام پہلوؤں کا جائزہ لیا جا رہا ہے، ڈرائیور کافی تیز رفتاری سے گاڑی چلا رہا تھا اور موٹر سائیکل سوار کو پیچھے سے ٹکر ماری۔
ڈمپر مالکان کا کہنا ہے کہ حادثے میں ملوث گاڑی سندھ سالڈ ویسٹ مینجمنٹ کے زیرِ استعمال تھی اور اس میں کچرا بھرا ہوا تھا، مشتعل افراد کی جانب سے آگ لگانے کے باعث لاکھوں روپے کا نقصان ہوا ہے۔
عینی شاہدین کے مطابق شہریوں نے شکایت کی ہے کہ شہر میں ڈمپر شہریوں کی جانیں لے رہے ہیں، لیکن کارروائی صرف عام شہریوں پر جرمانوں تک محدود ہے۔
