اسلام آباد — وفاقی وزیر اطلاعات و نشریات عطاء اللہ تارڑ نے کہا ہے کہ مس انفارمیشن آج کے دور کا سب سے بڑا چیلنج ہے اور موجودہ دور میں سوشل میڈیا کا ذمہ دارانہ استعمال لازمی ہے۔ انہوں نے خبردار کیا کہ مصنوعی ذہانت کے استعمال سے تخلیقی شعبوں میں ملازمتوں کے مسائل پیدا ہو رہے ہیں، لہٰذا ابھرتی ہوئی ٹیکنالوجی میں توازن قائم کرنا وقت کی ضرورت ہے۔
نیشنل سائبر سکیورٹی کی اختتامی تقریب سے خطاب کرتے ہوئے وفاقی وزیر نے کہا کہ سائبر سکیورٹی کو سمجھنے کے لیے سب سے پہلے آبادیاتی حقائق کا جائزہ لینا ضروری ہے۔ پاکستان کے سائبر اسپیس میں تقریباً 11 کروڑ 70 لاکھ انٹرنیٹ صارفین، 14 کروڑ 80 لاکھ موبائل براڈ بینڈ صارفین اور 7 کروڑ 90 لاکھ سے زائد سوشل میڈیا صارفین موجود ہیں۔
عطاء اللہ تارڑ نے کہا کہ ان اعداد و شمار کو مدنظر رکھتے ہوئے ڈیجیٹل اور سائبر سپیس کو دو واضح کیٹیگریز میں تقسیم کیا جا سکتا ہے، جس سے پالیسی سازی اور سائبر سکیورٹی کے اقدامات بہتر طریقے سے نافذ کیے جا سکتے ہیں۔
