شہریوں کو پانی سے متعلق مشکلات کا سامنا

ٹھٹہ (7 نومبر 2025): دھابیجی پمپنگ اسٹیشن پر کیبل فالٹ تاحال ٹھیک نہ ہو سکا جس کے باعث شہریوں کو پانی سے متعلق مشکلات کا سامنا ہے۔
ترجمان کے-الیکٹرک کی جانب سے جاری بیان میں کہا گیا کہ فورتھ فیز دھابیجی پمپنگ اسٹیشن کی بجلی 48 گھنٹے سے زائد وقت سے معطل ہے، کیبل فالٹ تاحال درست نہ ہو سکا تاہم ہماری ٹیم مرمتی کام میں مصروف ہے۔
کے-الیکٹرک نے کہا کہ زیر زمین کیبل فالٹ کے باعث بحالی کے کام میں مشکلات پیش آ رہی ہیں، فورتھ فیز دھابیجی پمپنگ اسٹیشن کی بجلی 5 نومبر کو کیبل فالٹ کے باعث بند ہوئی تھی، 3 پمپس بند ہونے سے شہر کو اب تک 140 ملین گیلن پانی کی کمی کا سامنا ہے۔

کراچی واٹر اینڈ سیوریج کارپوریشن کے ترجمان نے گزشتہ روز بتایا تھا کہ کے-الیکٹرک نے یقین دہانی کروائی ہے کیبل فالٹ 18 گھنٹوں کے اندر ٹھیک کر دیا جائے گا۔
تاہم ترجمان کے-الیکٹرک نے بجلی بریک ڈاؤن کی خبریں بے بنیاد قرار دیتے ہوئے کہا تھا کہ اسٹیشن پر 22 میں سے 19 پر بجلی سپلائی مسلسل جاری ہے، زیر زمین کیبل فالٹ کے باعث 3 پمپنگ موٹروں پر بجلی کا تعطل آیا، فالٹ درست ہوتے ہی تینوں پمپنگ موٹرز کی بجلی بحال کر دی جائے گی۔
گزشتہ ماہ 28 اکتوبر کو بھی حب کینال کی دیکھ بھال کے کام کی وجہ سے کراچی کو عارضی پانی کی بندش ہوئی تھی۔ اس دوران ویسٹ، کیماڑی اور سینٹرل اضلاع میں پانی کی سپلائی دو دن تک معطل رہی کیونکہ حب کینال کی 48 گھنٹے بندش کا اعلان کیا تھا۔
کراچی واٹر اینڈ سیوریج کارپوریشن نے شہریوں کو ہدایت کی ہے کہ وہ پانی کا احتیاط سے استعمال کریں اور ضروری مقدار پہلے سے ذخیرہ کر لیں تاکہ بندش کے دوران مشکلات سے بچا جا سکے۔